Raqamli iqtisodiyot va agrotexnologiyalar universiteti talabalari uchun 2025-yil 25-oktabr kuni unutilmas madaniy-ma’rifiy sayohat tashkil etildi. Ularning bu safardagi manzili — qadimiy tarix va boy madaniyat maskani bo‘lgan Samarqand shahri edi.
Sayohatning asosiy maqsadi talabalar ongida milliy qadriyatlar, tarixiy meros va vatanparvarlik tuyg‘ularini yanada chuqurlashtirish, shuningdek, ularning bo‘sh vaqtini mazmunli o‘tkazishdan iborat bo‘ldi.
Safar davomida talabalar Registon maydoni, Go‘ri Amir maqbarasi, Shohi Zinda majmuasi, Ulug‘bek rasadxonasi va Bibixonim masjidi kabi jahon miqyosida tan olingan tarixiy obidalarni ziyorat qildilar. Har bir maskan o‘zining betakror me’morchiligi, nozik naqshlari va o‘ziga xos tarixiy ruhi bilan talabalarda katta taassurot qoldirdi.
Tashrif jarayonida talabalar nafaqat tarixiy yodgorliklar bilan yaqindan tanishdilar, balki o‘z ko‘zlari bilan buyuk ajdodlarimiz ilm-fan, me’morchilik va san’at sohalarida yaratgan beqiyos merosni his etdilar. Ular uchun bu safar Vatanimiz tarixiga sayohat, milliy g‘urur va iftixorni uyg‘otuvchi unutilmas dars bo‘ldi.
Sayohat yakunida talabalar o‘z taassurotlarini baham ko‘rib, bunday tashabbus ularning ma’naviy olamini boyitganini, jamoaviy birdamlik va do‘stlik tuyg‘ularini mustahkamlashga xizmat qilganini ta’kidladilar.
Bunday tashriflar yoshlar ongida tarixiy xotirani saqlab qolish, milliy o‘zlikni anglash va Vatanga sadoqat ruhini kuchaytirishda muhim ahamiyat kasb etadi. Shubhasiz, Samarqandga uyushtirilgan ushbu sayohat har bir talabaning qalbida o‘chmas iz qoldirdi.
