Jamiyatimizda insonparvarlik, mehr-oqibat va o‘zaro yordam kabi fazilatlar har doim yuksak qadrlanib kelingan. Ana shunday ezgu maqsadni ko‘zlab, Raqamli iqtisodiyot va agrotexnologiyalar universiteti xodimlari hamda talaba-yoshlari “Men donorman” nomli xayriya aksiyasida faol ishtirok etdilar.
Mazkur aksiya doirasida universitet jamoasi Qon quyish markaziga tashrif buyurib, ixtiyoriy ravishda qon topshirdilar. Ushbu amal nafaqat jismoniy jihatdan sog‘lomlik ramzi, balki inson hayotini saqlab qolishdek oliy tuyg‘uga ham xizmat qiladi. Donorlik – bu xayrli ish, insonparvarlik va jamiyat oldidagi mas’uliyatni anglashdir.
Tadbir davomida shifokorlar ishtirokchilarga qon topshirish jarayoni haqida tushuntirish ishlarini olib bordilar, donorlikning sog‘lom turmush tarzidagi ahamiyati haqida ma’lumot berdilar. Har bir ishtirokchi o‘zining kichik hissasi orqali boshqa insonlar hayotini saqlab qolishga hissa qo‘shganidan faxrlanishini ta’kidlab o‘tdi.
Universitet ma’muriyati bu kabi aksiyalarni doimiy ravishda tashkil etish, yoshlar orasida donorlik madaniyatini shakllantirish va keng yoyishni muhim vazifalardan biri sifatida belgilab olgan. Zero, qon topshirish – insonparvarlikning yorqin namunasi bo‘lib, jamiyatimizdagi birdamlik va mehr-oqibat tuyg‘ularini yanada mustahkamlaydi.
“Men donorman” aksiyasi nafaqat xayriya tadbiri, balki inson hayotiga bo‘lgan hurmat va e’tiborning ifodasi sifatida ham ahamiyatli bo‘ldi. Bunday tadbirlar orqali yoshlarimizning qalbida ezgulik urug‘lari yanada chuqur ildiz otadi, ularning jamiyatda faol fuqaro sifatida kamol topishiga zamin yaratadi.
