Raqamli iqtisodiyot va agrotexnologiyalar universitetida “Bitiruvchi — 2026” tantanali bitiruv marosimi bo‘lib o‘tdi.
Bu kun — shunchaki diplom topshirilgan kun emas, balki to‘rt yil davomida bosib o‘tilgan ulkan yo‘lning yakuni va yangi, katta hayotning boshlanishidir.
48 nafar talaba bakalavriat bosqichini muvaffaqiyatli tamomlab, universitetimiz tarixidagi ilk bitiruvchilar safidan joy oldi. Ular UDEA’ning ilk qaldirg‘ochlari — universitetimiz bilan birga ulg‘aygan va uning ilk sahifalariga o‘z nomlarini yozgan avloddir.
Bugungi suratlar ortida esa oddiy xotiralar emas, balki minglab darslar, imtihonlar, sessiyalar, topshiriqlar, uyqusiz tunlar, hayajonli kutishlar va unutilmas talabalik onlarining butun bir tarixi mujassam.
Har bir bitiruvchining bugungi yutug‘ida ularga bilim bergan, yo‘l ko‘rsatgan va qo‘llab-quvvatlagan ustozlarning mehnati, sabri va fidoyiligi ham bor. Bugungi diplomlar — ustozlar bergan bilim va tarbiyaning, talabalarimizning esa tinimsiz mehnati va intilishlarining samarasidir.
Kecha ular UDEA ostonasidan talaba bo‘lib kirib kelishgan edi. Bugun esa qo‘llarida diplom, qalblarida orzu va oldilarida katta hayot bilan universitetimizni tark etmoqdalar.
Endi talabalikning oltin davri xotiraga aylanadi. Ammo universitetda orttirilgan bilim va do‘stliklar, ustozlarning o‘gitlari hamda to‘rt yil davomida yig‘ilgan tajriba ular bilan birga katta hayot sari yo‘l oladi.
Aziz bitiruvchilar, sizlar UDEA tarixining ilk bitiruvchilarisiz. Sizlarning har bir yutug‘ingiz — universitetimiz uchun faxr!
Parvozlaringiz baland, yo‘llaringiz yorug‘, kelajagingiz porloq bo‘lsin!
