Raqamli iqtisodiyot va agrotexnologiyalar universiteti talabalari O‘zbekiston Islom sivilizatsiyasi markaziga ma’rifiy tashrif amalga oshirdilar.
Tashrif davomida talabalar markazdagi boy tarixiy va ma’naviy meros namunalari bilan yaqindan tanishib, yurtimizda islom sivilizatsiyasining shakllanishi hamda rivojlanish bosqichlari haqida batafsil ma’lumotlarga ega bo‘ldilar. Ayniqsa, buyuk allomalarning ilm-fan, madaniyat va ma’rifat rivojiga qo‘shgan ulkan hissasi talabalarda katta qiziqish uyg‘otdi.
Ekskursiya jarayonida noyob qo‘lyozmalar, qadimiy eksponatlar hamda zamonaviy multimedia texnologiyalari asosida tashkil etilgan ko‘rgazmalar namoyish etildi. Talabalar tarixiy merosimizning bugungi kunda ham yuksak qadriyat sifatida asrab-avaylanayotganiga guvoh bo‘ldilar.
Tashrif davomida yoshlarga milliy va ma’naviy qadriyatlarni asrash, ajdodlar merosini chuqur o‘rganish hamda ulardan ilhom olishning ahamiyati haqida tushunchalar berildi.
Mazkur ma’rifiy tashrif talabalarning tarixiy xotirasini mustahkamlash, dunyoqarashini kengaytirish hamda ularda milliy g‘urur va vatanparvarlik tuyg‘ularini yanada kuchaytirishga xizmat qildi.
